ခုချိန်မှာ လူတစ်ယောက်ကို ဘာလုပ်ချင်လဲလို့ မေးရင် ခရီးသွားချင်တယ်လို့ ဖြေမှာ မလွဲလောက်ပါဘူး။ ခရီးသွားလိုက်တဲ့အခါ ကိုယ်ရောစိတ်ပါ လတ်ဆတ်ကျန်းမာလာတဲ့ ခံစားမှုကို ခုချိန်မှာ ပိုမိုတောင့်တလာကြပါပြီ။ ခရီးသွားရတာကို နှစ်သက်ခုံမင်လာပြီး တောက်လျောက်ခရီးတွေ သွားကြပြီးတဲ့နောက်မှာ သာမန်အပျော်ခရီးထက် ကျန်းမာရေးအတွက် အထောက်အကူပေးနိုင်ဆုံးဖြစ်တဲ့ခရီးတွေကို စီမံလာကြပါတယ်။ ခန္ဓာကိုယ်နဲ့ စိတ်ကိုပါ ထိရောက်တဲ့ သဘာဝကုထုံးတစ်ခုလို ကျန်းမာရေးအစီစဉ်တွေနဲ့ ခရီးတွေကို ပိုမိုနှစ်ခြိုက်လာကြတာကြောင့် ကမ္ဘာတဝှမ်းက ခရီးသွား ကုမ္ပဏီတွေကလည်း ကျန်းမာရေးခရီးသွားအစီစဉ်တွေကို ပိုမိုစီစဉ်လာကြပါပြီ။
ဒီလို ကျန်းမာရေးဆိုင်ရာခရီးသွား အစီစဉ်တွေက ရုပ်ပိုင်းဆိုင်ရာ ကျန်းမာရေးသာမက စိတ်ပိုင်းဆိုင်ရာကျန်းမာရေးသုခတွေကို ခံစားရရှိနိုင်တာမို့ ကျန်းမာရေးကိုလိုက်စားတဲ့ ခရီးသွားတွေအကြိုက် ဖြစ်လာကြပါတယ်။ ခုဆို ကမ္ဘာ့နာမည်ကြီးခရီးသွားကုမ္ပဏီတွေက “Wellness Tourism Market” ဆိုတဲ့ အစီရင်ခံစာတစ်စောင်ကိုထုတ်ပြန်လိုက်ပါတယ်။
ဒီအစီရင်ခံစာထဲမှာဆိုရင် မြောက်အမေရိကမှာ (အမေရိကန်၊ ကနေဒါနဲ့ မက္ကဆီကို)၊ ဥရောပမှာ (ဂျာမနီ၊ ပြင်သစ်၊ယူကေ၊ ရုရှားနဲ့ အီတလီ)၊ အာရှပစိဖိတ်မှာတော့ (တရုတ်၊ ဂျပန်၊ ကိုရီးယား၊ အိန္ဒိယနဲ့ အရှေ့တောင်အာရှ)၊ တောင်အမေရိကမှာ (ဘရာဇီး၊ အာဂျင်တီးနား၊ ကိုလံဘီယာ)၊ အရှေ့အလယ်ပိုင်းနဲ့ အာဖရိကမှာတော့ (ဆော်ဒီအာဗျ၊ ယူအေအီး၊ အီဂျစ်၊ နိုင်ဂျီးရီးယား၊ တောင်အာဖရိက) စတဲ့ နိုင်ငံတွေမှာ 2020 ကနေ 2026 ထိ ကျန်းမာရေးဆိုင်ရာ ခရီးသွားဈေးကွက်ကို ပိုမိုချဲ့ထွင်ကြတော့မှာ ဖြစ်ပါတယ်။
ပြည်တွင်းကျန်းမာရေးခရီးစဉ်တွေနဲ့ ပြည်ပကျန်းမာရေးခရီးစဉ်တွေကြောင့် ကိုဗစ်ကာလ ခံစားရတဲ့ ရုပ်ပိုင်းဆိုင်ရာ၊ စိတ်ပိုင်းဆိုင်ရာ ကျန်းမာရေးတွေကို ပြန်လည်ကုစားဖို့ အခွင့်ကောင်းတွေ မကြာမီ ရရှိခံစားကြရတော့မှာဖြစ်လို့ ကိုယ်သွားချင်တဲ့ခရီးလမ်းကြောင်းကို စိတ်ကူးပုံဖော်ရင်း လတ်တလော ကိုယ်စိတ်နှစ်ပါးကျန်းမာရေးကို ဂရုစိုက်ထားစေချင်ပါတယ်။
Editor: Aye Myat Khin
