ပုဂံရောက်တုန်း အကြော်စုံ ပူပူလေး စားကြမယ်။

ကျွန်တော်တို့ဟာ “ပုဂံ” ကို ရောက်တဲ့အခါ ဘုရားဖူးတာအပြင် ရောက်တုန်းရောက်ခိုက် ဒေသအစားအစာအစုံအလင်လေးတွေ မြည်းစမ်းကြည့်ချင်ကြတာကလည်း ပုဂံကို ခရီးသွားခြင်းရဲ့ အနှစ်သာရတစ်ခုပါပဲ။

ပုဂံ နှင့် တွဲမြင်တတ်ကြပြီး နေ့လည်နေ့ခင်း နားအေးပါးအေး ထိုင်လို့ရတဲ့ စားစရာဆိုင်တွေဆိုရင် အကြော်စုံဆိုင်တွေကို ဖယ်ထားခဲ့လို့ မရပါဘူး။

အသီးအရွက်အစုံ၊ အသားတု၊ ပဲပြား စတာတွေကို မုန့်အနှစ်ကောင်းကောင်းလေးနှင့် ဆီပူပူလေးထဲ ကြော်ထားပြီးမန်းကျည်းချဉ်ရည်လေးနှင့် တို့စားရတာကိုက ပုဂံက အကြော်စုံဆိုင်တွေရဲ့ အနှစ်သာရပါပဲ။ အချဉ်ရည်ထဲ ထည့်စားလို့ ရအောင် ဂေါ်ဖီထုပ် နှင့် ပူစီနံလေးတွေပါ ချပေးတာကလည်း အကြော်စုံရဲ့ အရသာကိုပိုမြိုင်စေပါတယ်။ ပုဂံရဲ့ အကြော်စုံဆိုင်လေးတွေကို ပြောရမယ်ဆိုရင်ဖြင့် ..

၁။ ဇီးရိပ် အကြော်စုံဆိုင်

ပုဂံရဲ့ အကြော်စုံဆိုင်ဆိုရင် ဇီးရိပ် အကြော်စုံဆိုင်ကို ချန်ထားလို့ မရပါဘူး။ ရွှေဆံတော်ဘုရားနားက ဇီးပင်အကြီးကြီးအရိပ်အောက်မှာ ရောင်းတဲ့ အကြော်စုံဆိုင်လေးပေါ့ဗျာ။ သူကတော့ နာမည်ကြီးပြီးသားဆိုတော့ ပြောစရာသိပ်မလိုလောက်တဲ့ အကြော်စုံဆိုင်ပေါ့နော်။

အကြော် (၁၀) ခုကို (၁၅၀၀) ကျပ် ပေးရပြီး ကျွန်တော့်အတွက်ကတော့ ပုံမှန်အရသာလို့ ပြောလို့ရတဲ့ အကြော်စုံဆိုင်ပါပဲ။ ပုဂံရဲ့ နေပူပူမှာ အမောပြောလေး အုန်းရည်မှာသောက်လို့ ရသလို အသုပ်စုံနှင့် မုန့်ပျားသလက်ပါ မှာစားလို့ ရပါတယ်။

၂။ ဇကောဝိုင်း အကြော်စုံဆိုင်

“ပဂေါ်စံလေးကို အကြော်ပန်းကန်ဘေးချပြီး ငေး” ဆိုပြီး စာသားနှင့် နာမည်ကြီးလာတဲ့ အကြော်ဆိုင်လေးကတော့ဇကောဝိုင်း အကြော်စုံဆိုင်ပါ။သူ့ဆိုင်မှာကတော့ အကြော် (၁၅) ခုကို (၂၀၀၀) ကျပ်ပေးရပြီး သူ့ဆိုင်ရဲ့ အသက်ကတော့ မန်းကျည်းချဉ်ရည်လေးပါ။

ပုဂံမှာ စားခဲ့သမျှ အကြော်စုံတိုင်တွေထဲ သူ့ဆိုင်က မန်းကျည်းချဉ်လေးကိုတော့ အကြိုက်ဆုံးပါပဲ။ သူ့ဆိုင်ကတော့ ပုဂံမြို့သစ်ဘက် လောကနန္ဒာဘုရား သွားတဲ့လမ်းမကြီးရဲ့ ညာဘက်မှာ ရှိပါတယ် ခင်ဗျာ့။

၃။ ရွှေညာသူ အကြော်စုံဆိုင်

သူကတော့ အခုနောက်ပိုင်းမှ အနော်ရထာလမ်းမကြီးပေါ် အလိုတော်ပြည့်ဘုရားနားမှာ ဖွင့်ထားတဲ့ အကြော်စုံဆိုင်သစ်လေးပေါ့ဗျာ။ အကြော် (၇) ခု ကို (၁၀၀၀) ကျပ် ပေးရတဲ့ သူ့ဆိုင်လေးက ထနောင်းပင်အရိပ်အောက်မှာ အေးအေးချမ်းချမ်းလေးသေချာ ခုံလေးတွေချပြီး ဆိုင်တစ်ဆိုင်ပါ။အကြော်အပြင် မုန့်ပျားသလက်ပါ ရတာမို့ ကိုယ် ကြိုက်သလို မုန့်ပျားသလက်ကို မှာစားလို့ ရပါတယ်။

အကြော်ထဲမှာ ထူးထူးခြားခြားအနေနှင့်ဆို တညင်းသီးအကြော်ပါ ရတဲ့ဆိုင်လေးပေါ့။ ပုဂံဟာ နေ့လည်နေ့ခင်းဆို အရမ်းပူလေ့ပူထ ရှိတာမို့ အဆာပြေ အကြော်စုံလေးစားရင်း နားနားနေနေ နေသင့်ပါတယ်။ ဒါဖြင့် ပုဂံကို ရောက်လို့ရှိရင် အကြော်စုံလေး စားရင်း ပုဂံမြေရဲ့ အနှစ်သာရလေးတွေကိုပါ ခံစားကြည့်ကြဖို့ မမေ့ကြပါနှင့်။

စာဖတ်သူများအားလုံး ပျော်ရွှင်တဲ့ခရီးတွေ ပိုင်ဆိုင်နိုင်ပါစေ။