ဘာသာရေးပေါင်းစုံက အဆောက်အအုံတွေ မြို့လယ်မှာ စုနေတာမျိုး သိပ်ကိုရှားပါးပေမယ့် ရန်ကုန်မြို့လယ်မှာတော့ ရှိနေခဲ့တယ်လေ။ ဒါကိုကြည့်ခြင်းအားဖြင့် မြန်မာနိုင်ငံမှာဟိုးရှေးခေတ်တွေကတည်းက လူမျိုးပေါင်းစုံ ဘာသာပေါင်းစုံ နေထိုင်ခဲ့တာက အထင်းသားပါပဲ။ အာမေးနီးယန်းလူမျိုးတွေလည်း ရန်ကုန်မှာ အခြေချနေထိုင်ခဲ့ဖူးတာကို ရန်ကုန်မြို့လယ်ဗိုလ်အောင်ကျော်လမ်းနဲ့ ကုန်သည်လမ်းထောင့်က အာမေးနီးယန်းလူမျိုးစုတွေရဲ့ဘာသာရေးအဆောက်အအုံ စိန့်ဂျွန်းဘုရားရှိခိုးကျောင်းက သက်သေပြနေတာပါပဲ။
စိန့်ဂျွန်းဘုရားရှိခိုးကျောင်းဟာ မင်းတုန်းမင်းကြီးက အာမေးနီးယန်းလူမျိုးတွေအတွက် လှူတဲ့မြေနေရာပေါ်မှာဆောက်ထားတာဖြစ်ပြီးတော့ 1862 ခုနှစ်က ဆောက်ပြီး 1863 ခုနှစ်မှာ ပြီးစီးခဲ့တာဖြစ်ပါတယ်။
အာမေးနီးယန်းလူမျိုးတွေဟာ မြန်မာနိုင်ငံမှာ ဟိုးရှေးကတည်းက နေထိုင်လာခဲ့တာဖြစ်ပြီးတော့မှတ်မှတ်သားသားရှိတာပြောရရင်တော့အင်းဝခေတ်နေပြည်တော်မှာ အာမေးနီးယန်း-မြန်မာ လူမျိုးတွေရာနဲ့ချီပြီး တာဝန်ထမ်:ဆောင်ခဲ့တဲ့မှတ်တမ်းရှိပါတယ်။
နောက်ပိုင်းမှာတော့ အာမေးနီးယန်း-မြန်မာလူမျိုးတွေဟာ မြန်မာနိုင်ငံက မန္တလေး၊ အမရပူရနဲ့ရန်ကုန်တို့မှာ စီးပွားရေးလုပ်ငန်းရှင်တွေအဖြစ် နေထိုင်ခဲ့ကြပါတယ်။ ဒီအတွက် သိသာတဲ့အရာတစ်ခုကရန်ကုန်မြို့ကမ်းနားလမ်းက စထရန်းဟိုတယ်ကို အာမေးနီးယန်း ညီအစ်ကိုနှစ်ယောက်က
တည်ဆောက်ခဲ့ကြတာဖြစ်ပါတယ်။
နောက်တစ်ခုအနေနဲ့ကတော့ အာမေးနီးယန်းလူမျိုး Peter Aratoon ဆိုသူပိုင်ဆိုင်ခဲ့တဲ့ ရန်ကုန်မြို့ဘဏ်လမ်းပေါ်က ဘယ်လ်သဇာ (Balthazar) အဆောက်အအုံက ယခုထိရှိနေဆဲသက်သေတစ်ခုပဲဖြစ်ပါတယ်။
အာမေးနီးယန်းလူမျိုးတွေဟာ ဂျပန်ခေတ်က ရန်ကုန်ကို ဗုံးတွေကြဲကြတဲ့အချိန်တွေတုန်းကထွက်ပြေးတိမ်းရှောင်သွားကြသလို 1962 ခုနှစ်ကလည်း ထွက်ခွာသွားကြတာတွေ ရှိတဲ့အခါ ယခုမြန်မာနိုင်ငံမှာ အာမေးနီးယန်းလူမျိုး အနေနဲ့ အတော်လေး ရှားပါးသွားပါပြီ။
ရန်ကုန်မြို့လယ်က အာမေးနီးယန်းတို့အတွက် ဆောက်လုပ်ခဲ့တဲ့ စိန့်ဂျွန်းဘုရားကျောင်းကို လာရောက်တဲ့သူတို့လူမျိုးစုဟာ အနည်းအကျဉ်းပဲရှိပါတော့တယ်။ သွေးမနှောတဲ့ အာမေးနီးယန်းလူမျိုးအစစ်တစ်ယောက်ဟာ 2013 ခုနှစ်မှာ ကွယ်လွန်သွားခဲ့လို့ နှစ်ပေါင်း 400ကျော် နေထိုင်ခဲ့တဲ့ လူမျိုးစုတစ်ခု ကွယ်ပျောက်လုနီးဖြစ်နေခဲ့ပါပြီ။
ရန်ကုန်မြို့လယ်မှာတော့ တစ်ချိန်က နေထိုင်ခဲ့ဖူးကြတဲ့ အာမေးနီးယန်းမျိုးနွယ်စုတွေရဲ့ ကိုးကွယ်ရာစိန့်ဂျွန်းဘုရားရှိခိုးကျောင်းကြီး၊ ဂေါ့သစ်လက်ရာနဲ့ ပေါင်းစပ်ထားတဲ့ ဗိသုကာလက်ရာ ရှေးဟောင်းအဆောက်အအုံကြီးကတော့ နှစ်ပေါင်း ၁၅၀ ကျော်ပြီမို့ ရှေးဟောင်းမြို့ပြအမွေအနှစ်အဖြစ်ဂုဏ်ယူဖွယ်ရာ တည်ရှိနေပါတယ်။
