CoronaVirus ကြောင့် ခရီးသွားလာဖို့အခက်အခဲတွေရှိလာသလို လူတွေကလည်း ခရီးသွားဖို့ကိုကြောက်လာကြပါတယ်။ လေကြောင်းခရီးတွေအနေနဲ့လည်း ခရီးစဉ်တွေဖျက်သိမ်းရတာတွေ၊ ခရီးစဉ်တွေလျော့ချရတာမျိုးတွေလုပ်နေကြပြီး အဲ့အတွက် ခရီးသွားလာရေးနဲ့ပတ်သက်တဲ့လုပ်ငန်းတွေလည်း စီးပွားရေးကျနေကြပါတယ်။ ဒါကြောင့် ပိုက်ဆံချမ်းသာတဲ့သူတွေကတော့ အရေးပေါ်အလုပ်ကိစ္စအတွက် ခရီးသွားဖို့ရှိလာတဲ့အခါ private jet တွေကို သုံးလာကြပါတယ်။ BBC ရဲ့သတင်းအရဆို စင်္ကာပူအြခေစိုက် private jet စင်းလုံးငှားကုမ္ပဏီဖြစ်တဲ့ MyJet Asia က ပြီးခဲ့တဲ့လအတွင်းမှာ ၈၀ – ၉၀ ရာခိုင်နှုန်းလောက်ထိ စီးပွားရေးတိုးတက်မှုတွေရှိလာပြီး customer တော်တော်များများက ဘေဂျင်း၊ ရှန်ဟိုင်း နဲ့ ဟောင်ကောင်တွေကို အသွားများတယ်လို့ သိရပါတယ်။ ဟောင်ကောင်က Jetsolution လည်း စီးပွားရေးကောင်းနေပြီး အဓိကအားဖြင့် ဟောင်ကောင်ကနေ တိုင်ပေ၊ ကမ္ဘောဒီးယား၊ စင်္ကာပူ နဲ့ မလေးရှားတို့ကို အသွားများကြတယ်လို့ သိရပါတယ်။
တကမ္ဘာလုံးက private jet ကုမ္ပဏီတွေအကုန် စီးပွားရေးကောင်းနေကြပေမဲ့ တူညီတဲ့ပြဿနာတွေလည်း ရင်ဆိုင်နေကြရပါသေးတယ်။ အဲ့ဒါကတော့ Coronavirus ကူးစက်ခံထားရတဲ့နိုင်ငံတွေကို ပျံသန်းဖို့အတွက် လေယာဉ်နဲ့ လေယာဉ်ဝန်ထမ်းတွေကို ရှာရခက်တဲ့ပြဿနာပါ။ ကူးစက်ခံရတဲ့နိုင်ငံတွေကိုသွားခဲ့တဲ့ လေယာဉ်ဝန်ထမ်းတွေအနေနဲ့လည်း ရောဂါပိုးသတ်ဖို့အတွက် ၂ ပတ်လုံး အလုပ်မလုပ်ဘဲနေရမှာဖြစ်သလို သီးသန့်နေထိုင်ရမှာလည်းဖြစ်ပါတယ်။
Private jet တွေက အရမ်းချမ်းသာတဲ့သူတွေ၊ celebrities တွေမှ စီးနိုင်တယ်ဆိုတဲ့ အတွေးတွေရှိကြပါတယ်။ ဒါပေမဲ့ အခုနောက်ပိုင်းမှာ private jet ကုမ္ပဏီတွေက ဈေးနှုန်းသက်သက်သာသာနဲ့ ငှားရမ်းနိုင်အောင် စီစဉ်ထားကြပါတယ်။ လေယာဉ်စင်းလုံးဝယ်စရာမလိုဘဲ နာရီအလိုက်ငှားလို့ရပါတယ်။ Paramount Business Jet ရဲ့ဈေးနှုန်းတွေကို ဥပမာအနေနဲ့ပြောပြရမယ်ဆို လူ ၂ ယောက်ကနေ ၄ ယောက်ထိစီးနိုင်တဲ့ လေယာဉ်အသေးစားကို တစ်နာရီ $2,400 ဝန်းကျင်၊ လူ ၈ ယောက် ကနေ ၁၀ ယောက်ထိစီးနိုင်တဲ့ လေယာဉ်အလတ်စားကို တစ်နာရီ $6,000 ဝန်းကျင်အနေနဲ့ ငှားရမ်းလို့ရနေပါပြီ။
Private jet တွေနဲ့ ခရီးသွားတာက CoronaVirus ကိုလည်း အတတ်နိုင်ဆုံး ရှောင်ရှားလို့ရတဲ့ ခရီးသွားနည်းတစ်ခုလည်း ဖြစ်လာပါတယ်။ ဒီအချိန်မှာ Private jet တွေနဲ့ခရီးသွားတာက ဇိမ်ခံဖို့အတွက်မဟုတ်တော့ဘဲ လိုအပ်လို့သုံးရတာမျိုးဖြစ်နေပါပြီ။ တတ်နိုင်တဲ့သူတွေကလည်း ရောဂါပိုးကူးစက်နိုင်တဲ့ အများသုံးလေယာဉ်တွေကိုမစီးတော့ဘဲ private jet ကိုပဲ စိတ်ချမ်းချမ်းသာသာနဲ့ စီးဖို့ ရွေးချယ်ကြပါတယ်။ private jet တွေရဲ့လေဆိပ်တွေက ပုံမှန်အားဖြင့်ဆို ခပ်သေးသေးပဲမို့လို့ လူတွေနဲ့ထိတွေ့ဆက်ဆံရတာမျိုး သိပ်မရှိတာကြောင့် ရောဂါကူးစက်ခံရနိုင်ချေနည်းလို့ private jet တွေကို ရွေးချယ်ကြတာလည်းပါပါတယ်။ Vanderbilt တက္ကသိုလ်ရဲ့ ကူးစက်ရောဂါဌာနခွဲက professor ဖြစ်တဲ့ ဒေါက်တာ William Schanffner ကတော့ လက်ကိုမကြာခဏဆေးတာက ရောဂါကိုကာကွယ်ဖို့အကောင်းဆုံးနည်းဖြစ်ပြီးတော့ နှုတ်ခမ်းတွေ၊ ပါးစပ်တွေကနေတဆင့် ရောဂါဝင်ရောက်နိုင်လို့ နှုတ်ခမ်းတို့၊ ပါးစပ်တို့ကို ထိတွေ့ကိုင်တွယ်တာမျိုးရှောင်ကြဖို့ CNN နဲ့ အင်တာဗျူးတုန်းက ပြောခဲ့ပါတယ်။
