Gel Manicure တွေကို အိမ်မှာပဲ ဖျက်ကြရအောင်

Gel လက်သည်းနီတွေဆိုးထားပြီးရင် Salon သွားသွားပြီးဖျက်ရတာအလုပ်တခုလိုကိုဖြစ်တာနော်။ အလုပ်တွေကလည်းရှုပ်၊ Salon လည်း မသွားနိုင်၊ Gel လက်သည်းတွေကိုလည်း ဖျက်ချင်နေပြီဆိုတာမျိုးက Gel Manicure လုပ်တဲ့သူတိုင်း ခံစားဖူးကြမှာပါ။ ဒါတွေကိုသိလို့ Salon မသွားနိုင်ခဲ့ရင် အိမ်မှာပဲ အလွယ်တကူ ဖျက်လို့ရအောင် မျှဝေပေးချင်ပါတယ်။

လုပ်ထားတဲ့ Gel လက်သည်းနီအရှည်က သိပ်မရှည်ဘူးဆိုရင် လက်သည်းရှည်လာတဲ့အခါ ကြည့်လို့အဆင်ပြေပေမဲ့ Gel ကို အကြာကြီးထားတာက လက်သည်းအတွက်မကောင်းပါဘူး။ ကြာတဲ့အခါ လက်သည်းမှာ အဝါရောင်တွေကျန်တာ၊ လက်သည်းပျက်စီးတာတွေဖြစ်တတ်ပါတယ်။ နောက်ပြီး လက်သည်းရှည်လာတဲ့အချိန်ဆို ပင်ကိုယ်လက်သည်းနဲ့ တပ်ထားတဲ့ Gel လက်သည်းရဲ့ အလေးချိန်မမျှတာမျိုးဖြစ်လာပြီး လက်သည်းထိပ်တွေ မညီမညာဖြစ်လာတာ၊ အထိမခံတာမျိုးတွေလည်း ဖြစ်လာတတ်တယ်။ ဒါကြောင့် ဖြုတ်ရမယ့်အချိန်ရောက်ရင် ဖြုတ်ကိုဖြုတ်သင့်ပါတယ်။

ဆိုတော့ အိမ်မှာပဲ ကိုယ့်ဘာသာဖြုတ်လို့ရမယ့်နည်းလေးသိထားမယ်ဆို တခါတလေ Salon သွားမဖြုတ်နိုင်တဲ့အခါမျိုးမှာ အသုံးဝင်တာမို့ အဲ့နည်းလေးကို အခုပြောပြပေးသွားပါမယ်။ ဒီနည်းလေးက နိုင်ငံတကာက Dermatologist တွေကိုယ်တိုင် ညွှန်းထားတဲ့နည်းလမ်းလေးမို့ safe လည်းဖြစ်ပါလိမ့်မယ်။

ပထမဆုံး Gel Nail တွေကိုဖြုတ်မယ်ဆိုလိုအပ်တဲ့ ပစ္စည်းလေးတွေကို ပြောပြပေးပါမယ်။ လိုတာတွေကတော့…

• Vaseline Petroleum jelly 
• ဂွမ်း 
• ကတ်ကြေး
• Acetone (100%)
• အစားသောက်ပတ်တဲ့ ပလတ်စတစ်အပျော့သား
• အဝတ်စ တခု
• Nail file (medium 180 grit)

Gel Nail တွေကို ဘယ်လို ဖြုတ်ကြမလဲ?

လိုအပ်တဲ့ပစ္စည်းတွေရပြီဆို ဖြုတ်ရမယ့်နည်းလေးတွေကို ဆက်သွားကြမယ်။ 

ပထမဆုံးအနေနဲ့ Nail file အသစ်နဲ့ Gel Nail Polish ရဲ့ Top coat တွေကို ဖြည်းဖြည်းချင်း ပွတ်ချပေးရပါမယ်။ Nail file က 180 grit နဲ့ဆိုရင်တော့ ပိုအဆင်ပြေပါတယ်။ Nail file နဲ့ပွတ်ရင်း အရောင်ပြယ်သွားပြီ၊ မွဲခြောက်ခြောက်ဖြစ်လာပြီဆို ရပ်လိုက်လို့ရပါပြီ။ တခုရှိတာက ပွတ်တဲ့အခါ လက်သည်းနီအကုန်ကုန်သွားတဲ့အထိ မပွတ်မိအောင် သတိလေးထားဖို့လိုပါတယ်။ 

ပြီးရင်တော့ Gel Nail တွေမဖြုတ်ခင် လက်သည်းပတ်လည်ကနေရာလေးတွေကို Petroleum Jelly လေးသုတ်ပေးပါမယ်။ ဘာလို့သုတ်ရလဲဆိုရင်တော့ Gel Nail ဖယ်ဖို့သုံးတဲ့ Acetone က ပြင်းတာမို့လို့ လက်သည်းဘေးနားကအသားလေးတွေ မထိခိုက်အောင်လို့ပါ။

တတိယအနေနဲ့ ဂွမ်းလုံးလေးကို လက်သည်းတချောင်းချင်းစီရဲ့ size အတိုင်း ညှပ်ပါမယ်။ ဒီလိုညှပ်ရတာက ဂွမ်းကို acetone နှစ်ပြီး လက်သည်းမှာကပ်တဲ့အချိန် လက်သည်းဘေးက အသားလေးတွေကို acetone မထိအောင်ပါ။ ဂွမ်းလေးတွေကို ညှပ်ပြီးရင်တော့ ဂွမ်းတွေကို acetone အရည်နှစ်ပြီး လက်သည်းတွေပေါ် တင်ပါမယ်။ ပြီးရင် ပလတ်စတစ် wrap လေးနဲ့ တချောင်းချင်းစီကို ခပ်တင်းတင်းလေးပတ်လိုက်ပါမယ်။

ပြီးရင် အဲ့အတိုင်းလေး ၁၀ မိနစ် ကနေ ၁၅ မိနစ်လောက် ခဏထားပါမယ်။ Salon သွားသလိုလေးခံစားချင်ရင်တော့ လက်ကို ရေနွေးစိမ်ထားတဲ့ခပ်နွေးနွေး Towel လေးနဲ့ပတ်တာတို့၊ Heating Pad ရှိရင် Heating Pad လေးပေါ်တင်ထားတာတို့ လုပ်လို့ရပါတယ်။

တကယ်လို့ acetone မရှိတာတို့၊ acetone မသုံးချင်တာမျိုးတို့ဆို နောက်တနည်းနဲ့လုပ်လို့ရပါတယ်။ အဲ့ဒါကတော့ Nail file နဲ့ တိုက်တဲ့အဆင့်ပြီးရင် acetone သုံးတဲ့အဆင့်အစား လက်သည်းတွေကို ရေနွေး၊ ပန်းကန်ဆေးဆပ်ပြာဆီ နဲ့ ဆား လက်ဖက်ရည်ဇွန်းတစ်ဇွန်းခပ်ထားတဲ့ ပန်းကန်လုံးလေးထဲကို မိနစ် ၂၀ ကနေ ၃၀ မိနစ်လောက်စိမ်ထားလို့ရပါတယ်။ လက်သည်း အစိုဓာတ်လေးရအောင် cuticle oil ရှိရင် cuticle oil ထည့်ပြီး စိမ်လို့ရပါတယ်။

အချိန်ပြည့်သွားပြီဆိုရင်တော့ Gel Nail တွေကို ဖျက်မယ့်အဆင့်လေးရောက်ပါပြီ။ ခုနကအဆင့်လေးတွေ လုပ်ပြီးတာတောင်မှ Gel Nail က ဖျက်လို့အဆင်မပြေသေးဘူးဆို acetone စိမ်ထားတဲ့ ဂွမ်းလုံးလေးကို လက်သည်းပေါ်တင်ပြီး ခဏလောက်ထပ်ထားပေးရပါမယ်။ တကယ်လို့ ဖျက်လို့အဆင်ပြေရင်တော့ Gel Nail လေးကို ဖြည်းဖြည်းချင်းစီ ဖျက်လို့ရပါပြီ။ ဖျက်တဲ့အခါ ရေနွေးလေးစွတ်ထားတဲ့အဝတ်လေးနဲ့ကိုင်ပြီး ဖျက်လို့လည်းရပါတယ်။ ဖျက်ပြီးရင် အဲ့အဝတ်စိုလေးနဲ့ လက်သည်းလေးတွေကို ပွတ်ပေးပြီး သန့်ရှင်းပေးပါ။ 

အကုန်ဖျက်ပြီးသွားရင်တော့ acetone ကပ်နေတာမျိုးတွေမရှိအောင် လက်ကို ဆပ်ပြာနဲ့သေချာဆေးပေးပါ။ 

ပြီးရင်တော့ Petroleum Jelly ဒါမှမဟုတ် Cutical Oil လေးကို လက်သည်းနဲ့လက်သည်းဘေးကအသားလေးတွေပေါ် နည်းနည်းစီယူပြီး လိမ်းပေးပါ။ အဲ့လိုမျိုး ၇ ရက်လောက်ဆက်တိုက် လိမ်းပေးရင်ပိုကောင်းပါတယ်။ ဒီလိုလိမ်းပေးတာက acetone ကြောင့်ဖြစ်တဲ့ လက်သည်းခြောက်တာတွေ၊ အသားအရေနီတာမျိုးတွေကို ကာကွယ်ပေးပါလိမ့်မယ်။

ကဲ… ဒီလောက်ဆို Gel Nail တွေကို အိမ်မှာ လွယ်လွယ်ကူကူဖြုတ်ဖို့နည်းလမ်းလေးတွေ ရသွားကြမယ်ထင်ပါတယ်။ 

Gel Nail Polish တွေကို ခဏခဏဆိုးတာမျိုးက ပင်ကိုယ်လက်သည်းကို အားပျော့စေနိုင်တာမို့လို့ ခဏခဏ မဆိုးဖို့တော့ တိုက်တွန်းချင်ပါတယ်။ Gel Nail လေးဆိုးလိုက်၊ ခဏနားလိုက်လုပ်ပြီးမှ ဆိုးကြပါနော်။