စိတ်ဖိစီးမှုဟာ ကိုယ့်တစ်ယောက်ထဲအတွက် မဟုတ်ပါဘူး။ ဘဝမှာ ကိုယ်တစ်ယောက်ထဲ ခံစားနေရတယ်၊ ခက်ခဲနေရတယ်လို့ တွေးတတ်တဲ့သူတွေ ရှိကြတယ်နော်။ ကိုယ်ကလွဲရင် အစစအရာအရာအကုန်အဆင်ပြေနေကြတယ်လို့ထင်ပြီး အားကျစိတ်တွေ၊အားငယ်စိတ်တွေဝင်ပြီး ကိုယ့်ကိုယ်ကိုယ် ယုံကြည်မှုတွေ ပျာက်ဆုံးနေတတ်ကြတယ်။ ဒီလိုလူတွေကို ဟာလိဝုဒ်က စတားတွေက အားပေးလိုက်တဲ့ အခြေအနေတရပ် ဖြစ်ပေါ်ခဲ့တယ်။ အံ့အားသင့်စရာကောင်းလွန်းပြီး ချစ်ဖို့လည်း ကောင်:တဲ့အလေ့အကျင့်ပဲ။ တခြားသူတွေရဲ့ဝေဒနာကို သက်သာစေဖို့ ကိုယ့်စိတ်ကို ဖွင့်ပြတဲ့သူ၊ အဲဒါမှ ရိုးရိုးသာမန်လူတွေမဟုတ်ဘဲဟောလိဝုဒ်စတားတွေဆိုတော့ ပိုအံ့သြမိရတာပေါ့။ အဲဒါကတော့ တခြားမဟုတ်ပါဘူး။ဟောလိဝုဒ်စတားတချို့က တခြားသူတွေရဲ့ စိတ်ဝေဒနာတွေ တိုးတက်စေဖို့ သူတို့မှာရှိတဲ့စိတ်ဖိစီးမှုတွေ၊ စိတ်ဓါတ်ကျတဲ့ရောဂါတွေကို ဖော်ထုတ်ပြောသွားကြတာပါပဲ။
အဲဒီလို ဖွင့်ပြောတဲ့သူတွေထဲမှာ Dwayne Johnson ပါမယ်လို့ ဘယ်သူမှ ထင်မိမှာမဟုတ်ဘူးနော်။ Fast& Furious, Jumanji ရုပ်ရှင်တွေသာမက Titan Game Show မှာ host အဖြစ်နဲ့ တစ်ကမ္ဘာလုံးက Rock လို့ သိကြတဲ့ သူဟာ သရုပ်ဆောင်တစ်ဦးဖြစ်ရုံတင်မဟုတ်ဘဲ ထုတ်လုပ်သူ၊ စီးပွားရေးသမားတစ်ယောက်လည်းဖြစ်ပါတယ်။ ဗြိတိန်သတင်းစာ Express မှာ သူ့အသက် 15နှစ်အရွယ်က suicide လုပ်ဖို့ ကြိုးစားခဲ့ဖူးတဲ့အကြောင်းနဲ့ စိတ်နာကျင်ခံစားရဖူးတာတွေကိုဖွင့်ပြောခဲ့ပါတယ်။ ကိုယ့်စိတ်ကိုယ် နားလည်ဖို့ အချိန်ယူခဲ့ရတဲ့ အခြေအနေတွေကိုလည်းပြောပြခဲ့ပါတယ်။ စိတ်ဓါတ်ကျစရာတွေ ကြုံရတာ မင်းတစ်ယောက်တည်း မဟုတ်ဘူးဆိုတဲ့စကားနဲ့အားပေးစကားမျိုးကိုပြောသွားခဲ့တဲ့ Rock ကို အံ့သြချီးကျူးမိတယ်။
နောက် Rock အပြင် ကိုယ်သိပ်သဘောကျပြီး ကိုယ့်စိတ်ထဲမှာ ထင်မထားတဲ့ ဟောလိဝုဒ်စတားတွေရဲ့သူတို့စိတ်အခြေအနေတွေကို သိလိုက်ရတော့ ထပ်ပြီး အံ့သြစရာတွေ သိရပြန်တယ်။ကြည့်လိုက်တိုင်းကြည်လင်တောက်ပတဲ့ အလှနဲ့ အောင်မြင်တဲ့ ပေါ့ပ်အဆိုတော် Katy Perry ကိုစိတ်ဓါတ်ကျတတ်တဲ့သူလို့ စိတ်ဖိစီးမှုတွေနဲ့ခံစားနေရလိမ့်မယ်လို့ ထင်စရာမရှိပေမဲ့ သူလည်း စိတ်ဓါတ်ကျ၊ စိတ်ဖိစီးမှုတွေကို ရင်ဆိုင်ရုန်းကန်နေရတယ်လို့ သူမကိုယ်တိုင်ဖွင့်ပြောမှ မယုံချင်ပေမဲ့ ယုံခဲ့ရပြန်ပါတယ်။
နောက် အလန်းဆုံးဖက်ရှင်တွေနဲ့ ဆွဲဆောင်မှုအပြည့်နဲ့ ကမ္ဘာကျော်အဆိုတော် Lady Gaga ကလည်း အားလုံးကို အံ့အားသင့်စေတဲ့ စကားတစ်ခွန်းနဲ့ သူမရဲ့ စိတ်ကိုဖွင့်ပြခဲ့ပါတယ်။သူမရဲ့ ဘဝတစ်လျောက်လုံး စိတ်ဓါတ်ကျတာ စိတ်ဖိစီးမှုတွေခံစားရတာတွေ စ်မျိုးလုံးကိုခံစားခဲ့ရပြီးသူမအလွန်ပင်ပန်းခဲ့ရတယ်လို့ ဆိုခဲ့ပါတယ်။ လူတိုင်းဟာ ကိုယ့်ရဲ့စိတ်ပိုင်းဆိုင်ရာ ကျန်းမာရေးနဲ့ပတ်သက်ပြီး မြိုသိပ်ခံစားနေမဲ့အစား ဖွင့်ထုတ်ပစ်ဖို့လိုတယ်လို့သူမကိုယ်တွေ့နဲ့နှိုင်းယှဉ်ပြီးပြောပြခဲ့တယ်။
လူတိုင်းဟာ အဆင်ပြေနေတာချည်းမဟုတ်ဘူးဆိုတာ လက်ခံကြပေမဲ့ ပျော်ပျော်နေတတ်တဲ့သူတွေမှာတော့ စိတ်ဖိစီးမှုတွေ မရှိနိုင်ကြဘူးလို့ ထင်တတ်ကြတယ်လေနော်။ သူ့လိုပျော်ပျော်နေတတ်ချင်လိုက်တာလို့ အားကျမိလောက်အောင် ပျော်ပျော်နေတတ်သူတွေရဲ့စိတ်ကိုလိုချင်မိကြပါတယ်။ ဒါပေမဲ့ ပျော်ပျော်နေတတ်သူမှာလည်း စိတ်ဓါတ်ကျတာတွေ စိတ်ဖိစီးမှုကိုခံစားနေရတာတွေ ရှိတတ်ကြတာကို ကမ္ဘာကျော် The Mask ဇာတ်ကားရဲ့ သရုပ်ဆောင် Jim Carrey ကိုယ်တိုင်ပြောပြခဲ့တဲ့ သူ့ရဲ့စိတ်ကျန်းမာရေးလျို့ဝှက်ချက်တစ်ခုကြောင့် သိခဲ့ရပါတယ်။ ဘယ်လိုမှ မထင်ရလောက်တဲ့ လူပျော်တစ်ယောက်ဆီက အံ့အားသင့်စရာစကားပါပဲ။ သူကိုယ်တိုင်စိတ်ကျန်းမာရေးဆိုင်ရာ ကုသမှုခံယူဖူးတယ်လို့ပြောပြလို့သာ သူ့မှာ မှောင်မိုက်တဲ့နေ့ရက်တွေပိုင်ဆိုင်ခဲ့ဖူးပါလားဆိုတာ ယုံကြည်ရတာဖြစ်ပါတယ်။ သူ့ရဲ့ မှန်ကန်တဲ့ ကြိုးစားအားထုတ်မှုကြောင့်သာသူဟာ တောက်ပကြည်လင်တဲ့ နေ့ရက်တွေကို ပြန်လည်ပိုင်ဆိုင်ခဲ့ရတာဖြစ်မယ်လို့ ယုံကြည်မိပါတယ်။
စိတ်ဟာ ရေလိုကြည်လင်နေဖို့ လိုအပ်ပါတယ်။ ကြည်လင်တဲ့စိတ်ရှိမှသာ ပျော်ရွှင်ရတဲ့ဘဝကို ပိုင်ဆိုင်မှာလေ။ ရေလိုနေတတ်ဖို့လည်း လိုသေးတာပေါ့။ ကိုယ်က စီးနေတဲ့ရေလိုနေမှာလား? ဒီလိုဆိုရင်တော့မကောင်းတဲ့အရာတစ်ခုကို ဖြတ်သန်းနေရချိန်မှာ ဒီနေရာကနေ တခြားတစ်နေရာကို စီးဆင်းတတ်ဖို့လိုလာပါလိမ့်မယ်။ ကိုယ်က ငြိမ်နေတဲ့ ကန်ရေပြင်လို နေချင်သလား ? ဒီလိုဆိုရင်လည်း ကိုယ့်ဘဝထဲကနောက်ကျိနေတဲ့အရာတွေကို ဟိုးအောက်မှာ အနည်ထိုင်သွားစေဖို့ အချိန်တစ်ခုကို အေးဆေးစောင့်ဆိုင်းနိုင်ဖို့လိုအပ်လာပါလိမ့်မယ်။
သေချာတာတစ်ခုကတော့ စိတ်တွေကြည်လင်လန်းဆန်းပြီး ပျာ်ရွှင်တဲ့ဘဝတစ်ခုကို ပိုင်ဆိုင်ဖို့အတွက် ကိုယ့်ရဲ့စိတ်ကျန်းမာရေးကို အဓိကထား ဂရုစိုက်ဖို့လိုအပ်သလို ကြည်လင်တဲ့စိတ်ကိုရရှိဖို့မှန်ကန်တဲ့နည်းလမ်းတွေနဲ့ ကြိုးစားနေထိုင်ကြရင်း ပျော်ရွှင်သာယာတဲ့ဘဝပိုင်ရှင်တွေဖြစ်ကြစေချင်ပါတယ်။
