ပုဂံအပြန် လက်ဆောင်ဖြစ်လာမယ့် ပုန်းရည်ကြီးကိတ်

ကျွန်တော်တို့ဟာ ဒေသတစ်ခုက ပြန်လာတဲ့အခါ ဒီဒေသရဲ့ ထွက်ကုန်တစ်ခုခုကို အိမ်ပြန်လက်ဆောင် အဖြစ် ဝယ်လာတတ်ကြသလို ကျွန်တော့်လို ခရီးသွားရင် လက်ဗလာနှင့် အိမ်ပြန်တတ်တဲ့သူတောင် ဒီတစ်ခါ ပုဂံကအပြန်မှာ သတိတရ ဝယ်လာမိတဲ့ လက်ဆောင်လေးက ဘာများ ဖြစ်မလဲပေါ့ … အဲတာကတော့ ပုဂံရဲ့ ဒေသထွက်ကုန်ဖြစ်တဲ့ ပုန်းရည်ကြီးကိုမှ တစ်ဖန်ပြန်လည် ဆန်းသစ်ထားတဲ့ လောလောဆယ် ပုဂံမှာပဲ ရသေးတဲ့ ပုန်းရည်ကြီးကိတ် ပါ ခင်ဗျာ့။ ပုန်းရည်ကြီးကိတ် ဆိုတော့ ကျွန်တော့်ရဲ့ ပထမဆုံး အတွေးကတော့ ဘယ်လိုအရသာကြီးမျိုး ဖြစ်မလဲပေါ့နော် …

ပြန်စဉ်းစားကြည့်မယ်ဆိုရင် ပုန်းရည်ကြီးဆိုတာ ပဲပိစပ်ကနေ ထုတ်ထားတာမို့ ပုန်းရည်ကြီးကိတ်ဆိုတာ ပဲနှင့် လုပ်ထားတဲ့ ကိတ်တွေနှင့် အရသာဆင်ပါတယ်။ ပုန်းရည်ကြီးက အဆိမ့်နှင့် အချဉ် အရသာ နှစ်မျိုးရှိပြီးတော့ ကိတ်ကိုတော့ အဆိမ့်အရသာနှင့် အဓိက လုပ်တယ် ပြောပါတယ်။ နိုင်ငံခြားသားတွေက ပုန်းရည်ကြီးကို ပေါင်မုန့်နှင့် အသစ်အဆန်း ဆိုပြီးစားလေ့ရှိပေမယ့် နယ်ခံတွေကျ အဲလိုလည်း စားလေ့မရှိတာမို့ “ဘယ်လိုလုပ်ရင် စားလောက်ကြမလဲ” ဆိုတာ စဉ်းစားရင်း ဖန်တီးထားတဲ့ ကိတ်လို့ ပြောပါတယ် ခင်ဗျာ့။ ကိတ်သားကို ပုန်းရည်ကြီးနှင့် လုပ်ထားသလို အထဲမှာ ပါတဲ့ ခရင်မ်ကိုပါ ပုန်းရည်ကြီးနှင့် လုပ်ထားတာမို့ ပုန်းရည်ကြီး အရသာကိုမှ ချိုချိုဆိမ့်ဆိမ့်လေးနှင့် ခံစားရစေမှာပါ။ အခုလောလောဆယ်တော့ ပုဂံမြို့ရဲ့ သံတဲမုန့်တိုက် မှာပဲ ရသေးပြီးတော့ “ပုဂံကိတ်” လို့ အမည်ပေးထားပါတယ်တဲ့။

ဒါနှင့် ပုန်းရည်ကြီးကို ချစ်ရတဲ့သူတွေအတွက် အိမ်ပြန်လက်ဆောင်အနေနှင့် ဝယ်မယ်ဆိုရင် သုံးရက်လောက်အထိတော့ အထားခံတယ်လို့ ပြောပါတယ် ခင်ဗျာ့။ အဲဒီလို ပုဂံရောက်တုန်း ပုန်းရည်ကြီးကိတ်ကို စားချင်တယ်၊ လက်ဆောင်အဖြစ် ဝယ်ချင်တယ်ဆိုရင်တော့ – ငှက်ပစ်တောင်ဘုရားလမ်းအနီး၊ ညောင်ဦးမြို့နယ်၊ ညောင်ဦးသံတဲဟိုတယ် ဘေးကပ်ရက်မှာ ရှိတဲ့ – Thante Bakery (သံတဲမုန့်တိုက်) မှာ ဝယ်ယူရရှိနိုင်ပါတယ် ခင်ဗျာ့ …။ ဒါဖြင့် ပုဂံရောက်လို့ရှိရင် ပုန်းရည်ကြီးကိတ် ဆိုတာကို မြည်းစမ်းကြည့်ခဲ့ကြပြီး လက်ဆောင်သယ်ခဲ့ကြဖို့ မမေ့နှင့်နော်။ စာဖတ်သူများအားလုံး ပျော်ရွှင်တဲ့ခရီးတွေ ပိုင်ဆိုင်နိုင်ပါစေ။