ကျွန်တော်တို့ တစ်ချို့ညတွေမှာ စိတ်လွတ်ကိုယ်လွတ် မူးအောင် အရက်သောက်ပြီးကြရင် နောက်နေ့ မနက် အိပ်ရာထတာနှင့် ခံစားရလေ့ရှိတာကတော့ အရက်နာကျတာပါပဲ။ လူတစ်ယောက်နှင့် တစ်ယောက် limit မတူကြပေမယ့် အနည်းနှင့် အများတော့ အရက်နာကျတာကို ခံစားရတတ်ပါတယ်။ အဓိကကတော့ – ခေါင်းကိုက်တာ၊ နှုံးတာ၊ ပျို့တာအန်တာ ဗိုက်အောင့်တာနှင့်အတူ စိတ်မကြည်တာတွေပါ ဖြစ်ပြီး အရက်နာကျကြတာပေါ့ဗျာ။ ပြီးတော့ အရက်နာကျတာဟာ လူတစ်ယောက်နှင့် တစ်ယောက်ပေါ် မူတည်ပြီး (၂၄) နာရီကနေ (၇၂) နာရီအထိ ကြာတတ်ပါတယ် ခင်ဗျာ့။
ဒါဖြင့် အရက်နာကျတာ သက်သာစေဖို့ဆိုရင် –
(၁) ရေများများသောက်ပေးကြပါ။
အရက်နာကျတာရဲ့ အဓိကတရားခံကတော့ ရေဓာတ်ခမ်းခြောက်ကြတာပါ။ အရက်သောက်ပြီးရင် ဆီးများတဲ့အတွက် သောက်တာနှင့် ပေါက်တာ မမျှပြီး ရေဓာတ်ဆုံးရှုံးရတာမို့ ရေများများဖြည့်တင်းပေးဖို့ လိုပါတယ်။ အသီးဖျော်ရည်နှင့် အချိုရည်လေးတွေ သောက်သုံးသင့်ပေမယ့် ကော်ဖီနှင့် ပြန်ဖြေတဲ့ အလေ့အထကိုတော့ မကျင့်သုံးသင့်ပါဘူး။ ကော်ဖီကြောင့် ဆီးပိုသွားပြီး ရေဓာတ်ပိုခမ်းခြောက်နိုင်ပါတယ်။ ပြီးတော့ အရက်ကို အရက်နှင့် ပြန်မဖြေသင့်ပါ။ အရက်ကို အရက်နှင့် ပြန်ဖြေတာက အရက်နာကျတာကို ခဏ အချိန်ရွေ့ရုံသာ ဖြစ်တာမို့ ပြီးရင် နှစ်ဆ ခံရမှာပါ။
(၂) အဆာပြေလေးတွေ စားပေးပါ။
အရက်နာကျတဲ့အချိန်မှာ သွေးတွင်းအချိုဓာတ်ခမ်းခြောက်နေတတ်တာမို့ အစားဝင်အောင်စားဖို့ မမေ့ပါနှင့်။ အစာပျော့လေးဖြစ်ဖြစ် တစ်ခုခု စားပေးခြင်းဖြင့် သွေးတွင်းအချိုဓာတ် ပြန်ဖြည့်တင်းပေးနိုင်သလို အစာစားပေးခြင်းဖြင့် အစာအိမ်နာတာကိုလည်း သက်သာစေနိုင်ပါတယ်။
(၃) အိပ်ရေးဝအောင် အိပ်ပြီး အနားယူဖို့ လိုပါတယ်။
အရက်နာကျတဲ့အချိန်ဆိုတာ ခန္ဓာကိုယ်ထဲ ရှိတဲ့ ဆဲလ်တွေ ရောင်ရမ်းနေတဲ့အချိန်မို့ ကောင်းမွန်စွာ အနားယူပေးဖို့ လိုအပ်ပါတယ်။ အေးဆေးတဲ့ အလုပ်တွေ လုပ်လို့ရပေမယ့် ပြင်းပြင်းထန်ထန် လှုပ်ရှားသွားလာခြင်းကိုတော့ ရှောင်ရှားသင့်ပါတယ်။ ပြီးတော့ အရက်သောက်ပြီးတဲ့အချိန် အိပ်ပျော်တယ် ထင်ရပေမယ့် အဲတာဟာ နှစ်ခြိုက်စွာ အိပ်ပျော်ခြင်း မဟုတ်တာမို့ အရက်နာကျနေတဲ့အချိန်မှာ အိပ်ရေးဝအောင် ကြိုးစားပြီး အိပ်ပေးဖို့ လိုအပ်ပါတယ်။ ကဲ … ဒါဖြင့် ရောင်ရမ်းနေတဲ့ ခန္ဓာကိုယ်ထဲက ဆဲလ်လေးတွေ သက်သာစေဖို့၊ ခန္ဓာကိုယ်ကို ရေဓာတ်ပြန်ဖြည့်ပေးနိုင်ဖို့၊ နွမ်းလျနေတဲ့ ဦးနှောက်နှင့် အသည်းက ဆဲလ်တွေ သက်သာစေဖို့ ရေများများသောက်ပြီး ကောင်းမွန်စွာ အနားယူပေးကြဖို့ အကြံပေးချင်ပါတယ် ခင်ဗျာ့။ မိမိကျန်းမာရေးကို နည်းလမ်းမှန်စွာ စောင့်ရှောက်တတ်ပါစေ။
