စိတ်ကျန်းမာစေဖို့အတွက်လိုအပ်မယ့် ဦးနှောက်လေ့ကျင့်ခန်းများ

“သင့်ရဲ့စိတ်ကျန်းမာဖို့ သင့်ခန္ဓာကိုယ်ကိုဂရုစိုက်ပါ” ဆိုတဲ့ စကားအတိုင်း ဦးနှောက်ကို လေ့ကျင့်ခန်းလုပ်ရင်း စိတ်ရောကိုယ်ရောကျန်းမာအောင် စောင့်ရှောက်ကြတာပေါ့။ နေ့စဉ် ပုံမှန်လေ့ကျင့်ခန်းတွေကလည်း ဦးနှောက်ကို ကျန်းမာအောင်စောင့်ရှောက်တဲ့ နည်းလမ်းတစ်ခုပါပဲ။နောက်ထပ် ဦးနှောက်လေ့ကျင့်ခန်းတစ်ခုက ကိုယ့်မှတ်ဉာဏ်ထဲမှာရှိတဲ့ ကိုယ့်နေထိုင်ရာနေရာပတ်ဝန်းကျင် (သို့) ကိုယ့်မြို့ရဲ့မြေပုံကို ဆွဲကြည့်ပါ။ ဒီလို မြေပုံဆွဲခြင်းဟာ ဦးနှောက်ကို လှုပ်ရှားမှု အမျိုးမျိုးဖြစ်စေတာမို့ စိတ်ကျန်းမာရေးအတွက် အထောက်အပံ့ဖြစ်တဲ့ ဦးနှောက်လေ့ကျင့်ခန်းတစ်ခုပဲ ဖြစ်ပါတယ်။

နောက်ထပ်ဦးနှောက်လေ့ကျင့်ခန်းတစ်ခုက အသစ်တွေကို သင်ယူကြည့်ဖို့ပါပဲ။ ကိုယ်မတတ်သေးတဲ့ အရာတစ်ခုကို သင်ယူနေခြင်းကလည်း ကိုယ့်ဦးနှောက်ကို လေ့ကျင့်ခန်းလုပ်ပေးခြင်းတစ်မျိုးပဲဖြစ်ပါတယ်။ နောက်ထပ်စိတ်ဝင်စားစရာတစ်ခုက ကိုယ်က ညာသန်ဆိုပါစို့… ဘယ်လက်နဲ့ စာရေးကြည့်ပါ။ တကယ်လို့ ဘယ်သန်ဖြစ်နေရင် ညာလက်နဲ့စာရေးတာ၊ ပုံဆွဲတာတွေကို လုပ်ကြည့်ပါ။ ဒါတွေက ဦးနှောက်ကို ရှင်သန်စေတဲ့ အကောင်းဆုံးလေ့ကျင့်ခန်းတွေထဲက တစ်ခုဖြစ်ပါတယ်။

နောက်တစ်နည်းကတော့ လူမှုပေါင်းသင်းဆက်ဆံရေး ကောင်းအောင်လုပ်ပေးဖို့ပါပဲ။ ဒီနည်းက လူတစ်ယောက်ချင်းစီရဲ့ စိတ်တွေကို မြင်နိုင်ပြီး ကိုယ့်စိတ်နဲ့ ဦးနှောက်ကိုလည်း များများအလုပ်ပေးနိုင်တဲ့ လေ့ကျင့်ခန်းတစ်ခုပါပဲ။ တရားထိုင်တာ၊ အာရုံစူးစိုက်မှုတစ်ခုလုပ်နေတာတွေကလည်း ဦးနှောက်မှတ်ဉာဏ်ကို ကောင်းမွန်စေတာမို့ ဒီနည်းကိုလည်း လုပ်ဖို့ တိုက်တွန်းချင်ပါတယ်။

တခါတရံ ပျင်းလို့ ဂိမ်းကစားချင်လာရင်တော့ ဦးနှောက်ကိုလေ့ကျင့်ပေးတဲ့ ဂိမ်းတွေရွေးချယ်ဆော့ဖို့ တိုက်တွန်းချင်ပါတယ်။ website အသစ်တွေဖြစ်ဖြစ်၊ App အသစ်တွေပဲဖြစ်ဖြစ် တခုခုကို လေ့လာနေမယ်ဆိုရင်လည်း ဒီနည်းက စိတ်ပိုင်းဆိုင်ရာ ပြောင်းလွယ်ပြင်လွယ်ဖြစ်ခြင်းကို တိုးတက်စေလို့ ကောင်းမွန်တဲ့ ဦးနှောက်လေ့ကျင့်ခန်းတစ်ခုပါလို့ ပြောချင်ပါတယ်။

ဒါပေမဲ့ ကွန်ပြူတာ၊ စမတ်ဖုန်းတွေမှာ အချိန်ကုန်လွန်သွားရင်တော့ ကိုယ်လက်လှုပ်ရှားလေ့ကျင့်ခန်းတွေလုပ်ဖို့ နဲ့ တခြားအရေးကြီးတဲ့ ဦးနှောက်လေ့ကျင့်ခန်းတွေကို လုပ်ဖြစ်တော့မှာမဟုတ်ဘူးဆိုတာကိုတော့ သတိပြုစေချင်ပါတယ်။

Reference;
https://www.verywellmind.com